عارف ايه أكبر مشكله ممكن تقابلك وانت بتشطب ؟؟

انك تختار سيراميك غلط ,, هتعيش طول العمر ف الشقه مدايقك ومش هاين عليك تكسروا وتغيروا  ,, وناس كتير ياما غيرت شققها بسبب السيراميك والبورسلين مش مريح ,,, مش مريح شكلا وتركيبا ,, يعني ايه ؟؟

يعني متركب غلط او إختيار الشكل يكون غلط


وعشان كدة هنقولكم النهاردة إزاي تختار السيراميك صح وازاي تركبه

بند السيراميك والبورسلين

لما بتخلص كهربا وسباكه ومحاره وتخلص مرحلة تأسيس الدهانات اللى طبعا بتتعمل قبل السيراميك
المفروض بتروح من قبلها تختار السيراميك او البورسلين عشان بياخد وقت ف الوصول
تمام
لو عايز تجيب أرضيات سيراميك او بورسلين عندك ( عبد العزيز السلاب واخواته كلهم , مظلوم , محجوب , الحويفي , كليوباترا ,,, ومعارض تانيه كتير )
طب انهو معرض احسن ؟
مفيش حاجه اسمها أنهو معرض احسن .. لازم تنزل وتبص على الانواع والاشكال كلها ,, وتختار الشكل اللي هيعجبك ,,, اختيار السيراميك فن .. لازم تاخد حد بيتقنه معاك وانتا نازل لانك لو نزلت ومش عارف هتختار ايه ,,, ممكن تعك الدنيا ولما يركب ..هتلاقي الشقه مهرجان “
حط لنفسك بادجيت متخرجش عنها ,,, والتزم بيها ,
حاول وانت بتشتري تحط 10% كمية اضافيه على كل نوع علشان الهالك وعشان ميعجزش معاك ,, ولو فاض منك كمية ,, حافظ عليها واعملها مرتجع .
“” المعرض هيتفق معاك على يوم عشان هيجبلك الانواع اللى طلبتها ,, لازم تكون مجهز عمال عشان يطلعوا السيراميك . ومتنساش تراضى السواق  .

ملحوظة مهمة :

اي مقاس اكبر من 30*60 سم لازم يتلزق عشان ميتطبلش بعد كدة اقل من كدة يتعمل بمونه عادي

هتتصل ب ” المبلط ” وهييجي يشوف الانواع اللى انت جبتها و مقاساتها وهيديك سعر للمتر ,

طريقة التركيب :

* المبلط اول حاجه بيعملها بيبدأ يعمل مراجعه على الشقة بتاعت اماكن ( البلاعات ) عشان يتأكد ان الشرب اللى اخدته قبل كدة مظبوط ,,, ولو مظبوط بيبدأ يشتغل ,, مش مظبوط ,, ؟ ساعتها بيشتغل على منسوب أعلي بيبه ,

* بيبدأ شغل في حوائط الحمامات والمطابخ وبعد كدة بيشتغل فى الارضيات مش العكس
* فيه حاجتين فالشغل : يا اما بصلايب ودة في حالة ان البلاط مظبوط و مفيهوش مشاكل ف المقاسات ,,

اما الصلايب و دي عبارة عن  مثلث بيحطه بين كل اربع بلاطات عشان يوحد الخطوط الافقية والرأسيه ( اللحامات )
ساعات بقي البلاط نفسه بيكون فيه مشاكل ف المقاسات ,,, ساعتها لازم تشتغل من غير صلايب والمبلط بيبدأ يظبطها بإيده ,,,

لازم تتأكد انه مش بيستخدم جبس برضه ,, ولو استخدم أقطعله ايده زي مبيض المحاره كدة بالظبط

وهو شغال لازم يظبط افقية كل بلاطه مع اللى جنبها وميكونش فيه ميول الا ف الحمامات والمطبخ لو فيه بيبه ( بلاعه ) بحيث ان الشرب يكون موحد في كل مكان في الشقه

بعد لما يخلص هيبدأ يسقي البلاط بمادة الجراوت او اسمنت ابيض بمياه مضاف اليه أكسيد لون عشان يكون قريب من لون البلاطه ويبدأ يملا اللحامات بين البلاط.


استلم منه ازاي ؟؟

الارضيـــات :-

بص هات قدة زي اللى موجودة مع مبيض المحاره وحطها على الارضية وحط عليها ميزان المياه ,, واتأكد انها مظبوطة .. القده بتديك نتيجة على مساحه كبيره ,, لو حطيت الميزان على بلاطه واحدة ,, انتا بتستلم البلاطه دي بس ,, ممكن اللى جنبها تكون فيها مشكله ف القدة بتساعدك اكتر وبتديك دقه اعلى .

الحمامات والمطابخ :-

افتح خرطوم مياه فيهم ,, لو المياه جريت على البلاعات يبقي كدة زي الفل
طب لو مجريتش ,.,, يبقي مشكلتك انت عشان مش متابع الصنايعي اللي شغال معاك

الفرق بين البورسلين والسيراميك :-

الفرق ان السيراميك عجينتين اما البورسلين عجينة واحدة .

المصنعيات :-

من 30 – 40 جنيه للمتر على حسب مقاس البلاطه وخامتها ,,

وحساب الوزره بيكون كل 2م طولي ب 1 م مربع

سعر السيراميك والبورسلين من 60 جنيه للمتر لحد 1500 جنيه لمتر  ,,, تفاوت كبير لان فيه المصري والمستورد ,,,
أحسنهم  :-   الاسباني في المستورد  و  الجوهره في المصري