قدامك طريقتين وهما :-

الطريقة الأولى :

  • انك بتشوف حاجه اسمها متوسط متر التشطيب ف السوق دلوقتي كام ؟ وتضربه ف مساحة شقتك الفعليه … متر التشطيب حاليا متوسطه 1350 جنيه للمتر * 120 م2 مساحة شقتك = يعني حوالي 156 ألف … خلي بالك دة المتوسط . ممكن توفر شوية في حالة انك جبت سيراميك رخيص او نوع دهانات أرخص من المتوسط .. وبالتالي هتقدر توفر
  • والطريقة ديه مش بتكون مفضلة انك تستعملها لانها مش دقيقة .

الطريقة التانيه :-
بتجيب متر وتروح شقتك وتبدأ تقيس مسطح كل فراغ عندك ومحيطه مضروب ف أرتفاع المكان وتكتب جنب كل فراغ مساحة الارضية والحوائط وتبدأ تشوف ف كل مكان هتعمل فيه إيه

مثال الريسيبشن : مساحة الارضية 30م2 ومحيطه 40 متر طولي مضروب ف 3 م ارتفاع الدور ..يعني حوائط الريسيبشن 120 متر مربع .

تشوف هتتفق مع الصنايعي على كام متر للدهانات وتضربه ف السعر اللي هيقولك عليه .. هتعرف تكلفة البند دة كمصنعية بس .

اما الخامات هتتكلف كام فقدام اختيارين :-

الاختيار الاول :-

ان تسأل الصنايعى المتر من نوع الدهان اللى هتختارة هيتكلف كام تقريبا وتضرب فى مساحة الحوائط عندك  فبكدة تعرف تكلفة الخامات فى البند دة .

الاختيار الثانى :-

انك تشوف هتختار خامة اية وتروح لاقرب محل بويات وتساله المتر من النوع دة هيتكلف كام تقريبا وهكذا تضرب فى مساحة الحوائط عندك وتعرف تكلفة الخامات فى البندة دة .

هذا الاختيار افضل حيث ان اسعار السوق متفاوتة و الصنايعى لا يعلم بها اول بأول .

وفى كلا الاختيارين متنساش تزود سعر النقل ولو انت ف دور عالي تخلي بالك انك هتجيب حد يطلعلك الخامات فوق .
وتعمل كدة ف كل بند.
مع العلم ان فيه بنود بتتحسب بالمتر المربع مضروب فى سعر المتر الواحد زي الدهانات والارضيات والالوميتال
او بالمتر الطولي ..كل مترطولي تكلفته كذة ودة بيكون مثلا ف وزر الرخام والسيراميك او تركيب الكرانيش الجاهزة ” الفيوتك “

وفيه حاجات بالمقطوعية : زي السباكه و مرمات المحاره مكان تكسير الكهربائي
او بالعدد  زى شغل الكهربا و الابواب
وكل بند بتحسب مصنعيته لوحده وخاماته لوحده … وتبدأ تسأل وتدور عشان ميتضحكش عليك ولكن خلي بالك من حاجه مهمه
من السعر العالي أوي أو السعر القليل
مثال : متوسط سعر الدهانات جودة كويسة ومراحل مظبوطة من 25-40 جنيه للمتر .
لو لقيت حد ب 15 جنيه للمتر يبقي مش هيطلعلك جودة كويسة ومش هيعمل المراحل المظبوطة .

في الأخر هيبقي عندك إجمالي تكلفة المصنعيات ودة مش هيتغير .
واجمالي الخامات ودة ممكن يتغير باختلاف سعر السوق او الخامة اللي هتشتريها
.